Er ekki margt sameiginlegt með viðskiptum og knattspyrnu?

Það hefur verið gríðarlega fróðlegt að fylgjast með umræðu undanfarinna daga. Margir virðast halda það að ráðamenn eða forsvarsmenn viðskiptalífsins hafi töfralausnir sem þeir hafa bara verið að bíða með að nota. Ég tel að staðreyndin sé einfaldlega sú að staðan er erfið og líklega erum við að tapa 2-0 í hálfleik. En það er ekki vonlaus staða og það hjálpar engum að áhrifaaðilar og fjölmiðlar tali á neikvæðum nótum. Á svona tímum verða hagsmunir heildarinnar að hafa forgang á hagsmuni einstakra aðila.

Það er allur seinni hálfleikur eftir og það þýðir ekki að eyða tíma og orku í það að pirrast yfir því að eitthvað vitlaust hafi verið gert. Nú þarf að snúa bökum saman og vinna að lausn. Aðeins er hægt að skora eitt mark í einu og ekki er ólíklegt að það kosti blóð svita og tár. En allir þeir sem hafa unnið leik eftir að hafa lent undir, þekkja hvað það er góð tilfinning þegar sigurinn er í höfn.

Reynum því að einblína á það verkefni sem við stöndum frammi fyrir. Hjálpumst að við það að jafna leikinn og komast yfir. Það gerist ekki með töfralausnum eða "reddingum". Það gerist með breyttum áherslum, vinnu, fórnum og samhentu átaki.